Во понеделник завршува поднесувањето на барањата од страна на земјоделските производители за финансиска поддршка за произведено и продадено кравјо млеко во периодот од 1 октомври до 31 декември 2009 година, а во согласност со Програмата за финансика поддршка во земјоделството за 2010 година. До крајот на предвидениот рок се очекува барања да достават сите млекопроизводители кои ги исполнуваат критериумите и кои ги комплетирале потребните документи за користење на средства од оваа програма. Висината на финансиската поддршка изнесува 2,5 денари за литар млеко. Со оваа Програма се предвидува и зголемување на поддршката и тоа: за 15 насто за семејни земјоделски стопанства кои се наоѓаат во подрачја со отежнати услови за производство, за 10 насто за млади земјоделци или жени-носители на земјоделско стопанство, доколку производните капацитети се во сопственост на носителот на стопанството и за зголемување за 5 насто за регистрирани земјоделци во согласност со Законот за вршење земјоделска дејност и за осигурениците на Фондот за пензиско и инвалидско осигурување со подмирени придонеси за пензиско, инвалидско и здравствено осигурување.
Следната можност за поднесување барања за финансиска поддршка за произведено и продадено млеко ќе бидат од 15 мај до 15 јуни за продадено млеко во периодот од 1 јануари до 31 април и од 5 октомври до 5 ноември за продадено млеко во периодот од 1 мај до 30 септември 2010 година.